Continuidade entre as materias de Bacharelato

Resumo da lexislación respecto da continuidade entre as materias de bacharelato en Galicia.

O DECRETO 86/2015, do 25 de xuño, polo que se establece o currículo da educación secundaria obrigatoria e do bacharelato na Comunidade Autónoma de Galicia, establece no seu artigo 36 o seguinte:

• A superación das materias de 2º curso que se indican no anexo VI (ver cadro) estará condicionada á superación das correspondentes materias de 1º curso indicadas no devandito anexo, por implicar continuidade.

• Non obstante, o alumnado poderá matricularse da materia de 2º curso sen cursar a correspondente materia de primeiro curso, sempre que o profesorado que a imparta considere que o alumno ou a alumna reúnen as condicións necesarias para poder seguir con aproveitamento a materia de segundo. En caso contrario, deberase cursar a materia de 1º curso, que terá a consideración de materia pendente, aínda que non será computable para os efectos de modificar as condicións en que se terá promoción a segundo.

A RESOLUCIÓN do 11 de maio de 2018, da Dirección Xeral de Educación, Formación Profesional e Innovación Educativa, pola que se ditan instrucións para o desenvolvemento, no curso académico 2018/19, do currículo establecido no Decreto 86/2015, do 25 de xuño, da educación secundaria obrigatoria e do bacharelato nos centros docentes da Comunidade Autónoma de Galicia, no seu artigo 23 establece que:

• O alumnado poderá cursar en 2º materias condicionadas á superación das correspondentes materias do primeiro curso non cursadas en 1º. 

• Esta acreditación poderase realizar: 

a) Cursando e superando a correspondente materia de primeiro.
b) O alumnado poderá matricularse da materia de segundo curso sen cursar a correspondente materia de primeiro curso, sempre que o profesorado que a imparta considere que o alumno ou a alumna reúne as condicións necesarias para poder seguir con aproveitamento a materia de segundo.

• En calquera caso, a decisión de que o alumnado reúne as condicións para poder seguir con aproveitamento a materia de 2º curso deberá adoptarse segundo criterios obxectivos e avaliables, de maneira que sexa posible acreditar tal condición. 

• O departamento didáctico correspondente poderá realizar unha proba. A data límite para a realización desta acreditación será antes do inicio das actividades lectivas. Desta circunstancia deixarase constancia mediante unha dilixencia no historial académico, no expediente académico e, de ser o caso, por medio de observación no informe persoal por traslado. 

• Esta materia de 1º curso non computará en ningún caso como materia exixible para reunir as condicións necesarias para poder presentarse á avaliación final da etapa.

• No caso de cursar simultaneamente as materias de 1º e de 2º, a materia de 1º non será computable para os efectos de modificar as condicións en que o alumno promocionou ao 2º curso. 

• Cando, por motivo da organización do centro, o alumnado de 2º curso non poida asistir á clase da materia de 1º, esta materia tratarase de forma análoga ás pendentes e o departamento didáctico que a imparte proporalle un plan de traballo con expresión dos contidos mínimos exixibles e das actividades recomendadas, e programará probas parciais para verificar a superación desa materia.