ORGANIZACIÓN DAS ENSINANZAS DE ADULTOS EN GALICIA

En que consisten as ensinanzas para adultos?

• Trátase dunha formación pública e gratuíta dirixida a calquera persoa que teña cumpridos os 18 anos e que abandonaron o sistema educativo sen obter a titulación básica.
• Estas ensinanzas organízanse de xeito algo diferente, tanto nas áreas impartidas como no horario. A titulación acadada é a mesma que nas ensinanzas ordinarias.
• Poden ser presenciais, semipresenciais ou a distancia.

Que tipo de oferta hai?

1. Ensinanzas de nivel I: dirixidas a persoas que necesiten adquirir técnicas básicas de lectura, escritura e cálculo. 

2. Ensinanzas de nivel II: dirixidas a persoas sen titulación que desexen acceder á educación secundaria de adultos. Esta formación é equivalente á educación primaria.

3. Ensinanzas de nivel III: dirixidas a persoas sen titulación que desexen obter o título de graduado en educación secundaria. Neste caso autorízase a matrícula a alumnos menores de 18 anos, en casos excepcionais, como ter un contrato laboral, ser deportista de alto rendemento, ter superado o 1º curso dun PCPI, ou ter cursado un PCPI sen superalo (pero hai que estar inscrito como demandante de emprego nunha oficina de emprego). Son as ensinanzas coñecidas como ESA. 

4. Bacharelato para persoas adultas: dirixidas ás persoas que teñan o título de ESO ou ESA, e que desexen adquirir novos coñecementos nunha determinada materia ou obter o título de bacharel en calquera das modalidades.

5. Ciclos formativos para persoas adultas: esta formación pretende facilitar ás persoas adultas a súa actualización, adquirindo novos coñecementos nunha determinada competencia profesional, ou para obter o título de técnico ou técnico Superior.

6. Aulas Mentor: cursos impartidos a distancia orientados a mellorar a capacitación profesional e a formación cultural das persoas adultas.

7. Galego e castelán para persoas inmigrantes: dirixido a cidadáns doutros países, residentes na Comunidade Autónoma de Galicia, que necesiten coñecer as linguas oficiais. Estas ensinanzas impártense nos centros de adultos, en grupos reducidos, cunha duración de 10 períodos lectivos semanais distribuídos en horarios adaptados ás posibilidades de asistencia dos alumnos.

8. Probas de obtención de títulos: Estas probas convócanse anualmente co obxectivo de que as persoas maiores de 18 anos / 20 anos poidan acadar as titulacións de Educación Secundaria, Bacharelato e ciclos de FP por libre mediante un exame que avaliará os contidos básicos destas ensinanzas. 

A Educación Secundaria de Adultos (ESA): 

Como se organiza?

Estas ensinanzas son equivalentes ás da ESO. As materias organízanse en tres ámbitos de coñecemento:

1º Social: inclúe contidos de Ciencias Sociais, Xeografía e Historia, Educación para a Cidadanía, e os aspectos perceptivos correspondentes ás materias de Educación Plástica e Visual e Música.

3º Comunicación: Lingua galega e literatura, Lingua castelá e literatura, 1ª Lingua Estranxeira.

4º Científico—tecnolóxico: inclúe contidos de Tecnoloxías, Matemáticas, Ciencias da Natureza, e os aspectos relacionados coa saúde e co medio natural de Educación Física. 

Que duración ten?

Xeralmente duran 2 cursos académicos.En cada curso pódese cursar dous módulos, cunha duración cuadrimestral. Cada módulo correspóndese cun curso de ESO, quedando do seguinte xeito:

• No 1º ano impártese: módulo 1 (1º de ESO) e módulo 2 (2º de ESO)
• No 2º ano impártese: módulo 3 (3º de ESO) e módulo 4 (4º de ESO).

Poderás permanecer cursando estas ensinanzas o tempo que o teu ritmo de aprendizaxe o precise. Non hai límite de tempo.

Cales son os requisitos de acceso?

Para acceder ós módulos 1 e 2, hai que cumprir un dos seguintes requisitos:

• Ter superado o nivel II (Educación Primaria) das ensinanzas de adultos.
• Por validación de estudos (ter o certificado de estudos correspondente - aprobada a Educación Primaria)
• No caso de non poder acreditar estudos anteriores superar unha proba de avaliación inicial.

Para acceder ós módulos 3 e 4, hai que estar nalgunha das seguintes condicións:

• Ter superado os módulos 1 e 2 de ESA.
• Ter superados o 1º e 2º cursos de ESO, ou alomenos algún grupo de materias de 1º e 2º para poder validar algún ámbito dos módulos 1 e 2 de ESA. 
• Superar os módulos obrigatorios do 1º curso dun PCPI. 
• No caso de non poder acreditar estudos anteriores superar unha proba de avaliación inicial. 

No primeiro cuadrimestre (que se imparte de setembro a xaneiro) poden matricularse todas as persoas que cumpran dezaoito anos ata o 31 de decembro. Para o segundo cuadrimestre (que se imparte de febreiro a xuño), poden matricularse os que cumpran dezaoito anos ata o 30 de abril.

Que horario teñen estas ensinanzas?

• Terás ó redor de 20 horas semanais, que normalmente impártense en horario de tarde.
• Na modalidade semipresencial é obrigatoria a asistencia ás titorías de cada ámbito (unha hora semanal para o ámbito social, dúas sesións lectivas para o ámbito de comunicación e outras dúas para o ámbito científico­-tecnolóxico). A modalidade a distancia con titorías telemáticas non supón a asistencia a titorías presenciais. A comunicación cos titores é a través da Aula Virtual do IES San Clemente.

Cando solicito praza? (datas aproximadas)

Modalidade presencial:

• 1 –10 de setembro para o primeiro cuadrimestre.
• 8 –15 de xaneiro para o segundo cuadrimestre.

Modalidade a distancia semipresencial e telemática:

• 1 de Setembro – 15 de xaneiro para o primeiro cuadrimestre.
• 3 de Febreiro – 15 de maio para o segundo cuadrimestre.

Onde se ofertan estas ensinanzas?

• A modalidade a distancia telemática impártese no IES San Clemente (Santiago de Compostela).
• Consulta neste enlace a rede de centros que imparten Ensinanzas de Adultos. 

O Bacharelato para Persoas Adultas 

Como se organizan estas ensinanzas?

• Ofértanse dúas modalidades de Bacharelato: humanidades e ciencias sociais, ciencias e tecnoloxía.
• Poden seguirse como curso completo ou por materias de xeito independente.
• Se optas por seguir materias de xeito independente poderán cursarse, simultaneamente materias do 1º e do 2º curso.
• Na modalidade semipresencial, esíxese a asistencia obrigatoria ás titorías de cada materia (unha hora semanal por cada materia que se curse).
• A modalidade a distancia con titorías telemáticas non supón a asistencia a titorías presenciais. A comunicación cos titores é a través da Aula Virtual do IES San Clemente e os exames poden realizarse nas sete principais cidades galegas: Santiago de Compostela, A Coruña, Ferrol, Lugo, realizarse en Santiago de Compostela, Ourense, Pontevedra e Vigo.

Canto duran?

• O tempo de permanencia para cursar estas ensinanzas é de 6 anos académicos ( o tempo de permanencia no Bacharelato ordinario é de 4 anos).
• No caso de esgotar o 6 anos sen acadar os obxectivos previstos, os alumnos poderán seguir cursando as materias pendentes a través do réxime de ensinanza a distancia ata completaren a formación desexada.

Que requisitos de acceso hai?

Para acceder debes estar nalgunha das seguintes condicións:

• Posuír o título de graduado en educación secundaria
• Posuír o título de técnico nalgún dos Ciclos de grao Medio.

Onde se ofertan estes estudos?

• A modalidade a distancia telemática impártese no IES San Clemente (Santiago de Compostela).
• Consulta neste enlace a rede de centros que imparten ensinanzas de adultos.

Datas para a matrícula:

• Modalidade presencial: 1 – 12 de setembro. 
• Modalidade a distancia semipresencial: 1 – 12 de setembro. 
• Modalidade a distancia telemática: 15 de setembro – 21 de novembro (a dirección do IES San Clemente poderá autorizar a matrículación ata o 30 de abril por razóns xustificadas).

Os Ciclos Formativos para Persoas Adultas 

Como se organizan?

• Estas ensinanzas poden cursarse por ciclo completo ou de forma parcial por módulos (Oferta modular) 
• Se optas por cursar módulos de xeito parcial, poderás matricularte tanto de módulos de 1º como de 2º curso.

Canto duran estas ensinanzas?

• Non hai limitación de tempo. Podes cursalas o tempo que o necesites.

Cales son os requisitos de acceso?

• Os mesmos que para os Ciclos na modalidade ordinaria.
• Excepcionalmente podes acceder con 16 anos se acreditas a túa condición de traballador e cumpres os requisitos académicos de acceso.

Cal é a oferta de Ciclos Formativos de FP de adultos?

• Consulta neste enlace a oferta de Ciclos por adultos presencial e a distancia. 

Aulas Mentor 

Que son e a quen van dirixidas?

• Ensinanzas non regradas para persoas adultas, abertas, flexibles e a distancia, con titoría telemática a través de internet. Esta oferta formativa permite actualizar o perfil profesional, potenciar o acceso ao emprego e aumentar a formación básica. 
• Están dirixidos a persoas maiores de 18 anos que desexen formarse para acceder a un posto de traballo ou aumentar o seu nivel cultural. 
• Non se require titulación previa.

Como se organizan e que acreditación se acada?

• As aulas onde se realizan as actividades de formación dispoñen de recursos tecnolóxicos avanzados, así como de un profesor-administrador que axuda aos alumnos nas súas conexións á rede e na comunicación co seu titor. 
• O alumno recibe unha conta de conexión gratuíta a internet e non necesita asistir á aula, excepto para realizar a proba final presencial. 
• Os cursos poden iniciarse calquera día do ano escolar e cada alumno segue o seu propio ritmo de aprendizaxe. 
• O titor non está na aula, comunícase co alumno por correo electrónico e contesta en 24 horas a todas as dúbidas.
• Ao superar o curso, o alumno recibe unha certificación de aproveitamento emitida pola Consellería de Educación e Ordenación Universitaria e o Ministerio de Educación. 

Cal é a oferta destas ensinanzas?:

• Consulta neste enlace a oferta de Aulas Mentor en Galicia. 

Castelán e Galego para inmigrantes.

Ensinanzas destinadas a cidadáns doutros países, residentes na Comunidade Autónoma de Galicia, que necesiten coñecer as linguas oficiais. Estas ensinanzas impártense nos centros de adultos, en grupos reducidos, cunha duración de 10 períodos lectivos semanais distribuídos en horarios adaptados ás posibilidades de asistencia dos alumnos. Consulta neste enlace a oferta destas ensinanzas

As ensinanzas de adultos na modalidade semipresencial e a distancia.

En que consisten?

• Son as ensinanzas de adultos que permiten realizar os estudos na casa sen a necesidade de acudir diariamente a un centro educativo.
• Disponse de axuda ou de apoio a través de titorías individuais e colectivas, nas que aconsellan e orientan nas dificultades atopadas.
• Esixen un grao de responsabilidade e organización maior que nas ensinanzas presenciais, e aínda así , teñen o risco de abandono, por non ter que acudir diariamente ó centro.
• Estas ensinanzas son gratuítas. Solo hai que mercar o material didáctico (textos, guías, conexión a internet, ...).

Que oferta hai?

Como xa se sinalou anteriormente:

• Nivel III ou educación secundaria para persoas adultas.
• Bacharelato
• Ciclos formativos de formación profesional.

Probas de obtención de títulos.

Consulta nos seguintes enlaces estas probas:

• Probas libres FP
• Probas libres Bacharelato.
• Probas libres ESO.
• Enlace web Consellería.

Para saber máis:

Web oficial Ensinanzas de Adultos

Web oficial FP: Probas Libres e Admisión FP réxime Adultos

PDF informativo